Saba Budaya Kampung Dukuh jeung Workshop PKP Guru Basa Sunda SMP/MTs. sa-Kabupatén Garut
Ku:
Hendi Ahmad Sarip
D
|
ina
raraga ngajanggélékeun rarancang gawé tur aspirasi parapupuhu rayon katut sakumna
anggota, Musyawarah Guru Mata Pelajaran (MGMP) Basa Sunda Kabupatén Garut
ngayakeun ‘Studi Banding’ ka Kampung Dukuh, luyu jeung pamerdih kurikulum Basa
Sunda ngeunaan matéri ‘Kaulinan Barudak Lembur’ di kelas VII, matéri Artikel kelas
VIII tur matéri ‘Déskripsi Kampung Adat’ di kelas IX. Salian ti éta, tujuan kagiatan
ieu téh pikeun ngariksa, ngaraksa tur ngaronjatkeun ajén-inajén budaya bangsa titinggal karuhun nu linuhung.
Kagiatan
dilumangsungkeun dina poé Saptu – Ahad, ping 5 – 6 Oktober 2019. Anapon tempat pamiangan
ti Masjid Agung Garut dina jam 05.00 WIB, Subuh. Dumasar kana taliparanti, sakur
tatamu nu datang ka kampung Dukuh, pamilon awéwé diperdih sangkan maké papakéan
sarwa bodas, sedeng lalakina mah dipangsi hideung.
Pasamoan
di kampung Dukuh nu ngawengku acara prosési bubuka; rajah kampung Dukuh ku kersana
Drs. H. Iden Suparno, M. Pd., salaku pengawas pangajaran Basa Sunda; pangbagéa
ti Bu Lilis Yuniarningsih Wiranatakusumah, S. Pd., salaku pupuhu MGMP Basa Sunda
Kabupatén Garut; reujeung pangbagéa Mama Uluk, salaku pupuhu adat. Salian ti
ngabagéakeun, Mama Uluk gé ngabébérkeun ngeunaan sajarah katut taliparanti masarakat
adat.
Saréngséna
acara bubuka, kagiatan diteruskan kana mikawanoh kaulinan barudak lembur Kampung
Dukuh bari balakécrakan nu disayagakeun ku pupuhu éta lembur; salahsahiji
kabiasaan dina ngabagéakeun paratatamu.
Saméméh
jarah ka makam Syéh Abdul Jalil; nu munggaran dumuk di kampung Dukuh, sakabéh
pamilon kudu kuramas heula kalawan satutasna, awak teu meunang dielap ku anduk;
cukup sagaring-garing ku samping nu dipaké. Turta nalika ziarahna teu meunang
maké papakéan jero. Pikeun lalaki, ka handapna, cukup dibunian ku sarung.
Dipahing mawa alat éléktronik sarupaning hapé atawa nu lianna ka wewengkon
makam.
Réngsé
kagiatan di kampung Dukuh éta, lalampahan diteruskeun ka Gedong Lapan Santolo
Pameungpeuk pikeun ngagelar kagiatan séjénna. Di antarana; workshop, pinton
unjuk kabisa wawakil ti tiap rayon katut nyusun laporan kagiatan.
Poé
Ahad, sakabéh pamilon pelesiran di sabudeureun basisir Santolo tepi ka waktu nu
geus ditangtukeun pikeun mulang ka bumina sewing-sewangan.***
