Carita Nyambung : # Adi Pulung # Bagéan Ka-3.

#CaritaNyambung_#AdiPulung#_BagéanKa-3_Ku:RatnaNing#

Bari jeung kitu, da angger kuring tèh butuh sosok nu mikanyaah kuring, nu bisa diajak keur batur hirup saujratna. Kuring sok curhat ka Geri. Malah Geri sok nganteur kuring mun seug janjian jeung kekenalan lalaki.

###

"Geeerr...Tètèh gering. Panas tiris jaba ka jamban wae. Mules Ger!" Kuring nampa telepon Geri. Asa ku kabeneran, geus dua poè muriang jeung mèncrèt. Awak leuleus. Sapopoe ukur bulak balik ka jamban jeung ngagolèr di kasur.

"Euleuh...antosan. Geri kadinya. Tètèh geus mèsèr obat acan?"

"Acan!!"

Teu kungsi lila Geri datang. Angkaribung deuih. Mawa babaturanna saurang. Pajar keur saksi, bisi aya nu ngagerebeg.

"Geri rèk ngèndong. Rèk nungguan tètèh!" Datang tèh tuluy nyampeurkeun, nyabak tarang kuring.

"Ambeu...panasna Tèh. Sok geura leueut obatna. Obat muriang. Mèncrètna mah teu kudu diubaran. Da eta mah bakat tina panas. Dipijit wè ku Gèri!!" Kituna tèh manèhna ngawadahan bubur. Disendokan. Kuring dihuapan. Rada èra. Tapi Geri ngagebès.

Tuluy mecèhan obat, song cai. Meuni tulatèn. Kuring dititah ngagolèr deui. Nurut wè da awak leules kacida.

Geri sideku gigireun kuring. Leungeunna mencètan tarang. Leungeun. Suku jeung ramo ramona. Dipemcètan dirancetan lalaunan. Awak rada niisan. Reup peureum. Sarè tèh ngahaja ngampar kasur di tengah imah.

Tengah peuting nyaring. Kèsang jibreg. Beuteung karasa musial. Leuheung ayeuna mah ka jamban rada langla. Ngarèrèt ka gigir. Geri sarè kawas ngaringkukan kuring. Irungna ampir ngambung embun embunan bakat ku raket.

Awak nguniang. Turun tina kasur. Geri hudang.

"Teteh rèk ka jamban? Kuat teu? Ku Geri dianteur hayu!" Kuring gideug. Tapi Geri nuturkeun. Nyangkèh. Ngajega deukeut panto sumur. Nungguan.

"Tètèh aya nu dipikiran? Hampura, lila Geri teu nganjang. Geri keur ngurus ngurus lamaran. Hayang gawè deui. Kumaha kabogoh tètèh tèh?" Manehna nanya bari ngasongkeun roti jeung cai.

Kuring tungkul. Inget ka Jaenal, kabogoh anyar nu orowodol. Ngaku duda manahorèng tèh boga pamajikan. Nyeri hatè diteror na telepon, disebut pelakor ku pamajikannana. Padahal mah kuring teu apal. Nyerina tèh hatè kuring geus boga rasa nyaah jeung neundeun harepan gedè.

"Teu balèg Ger. Si Jaenal nipu. Nyeri hatè tètèh tèh. Kunaon ditipuan waè ku lalaki tèh..." sora kuring dareuda. Puguh meureun gering ge bakat ku wales mikiran cinta.

"Pan ceuk Geri gè kadè sing taliti. Lalaki ayeuna mah loba nu modus" cenah bari nyingraykeun buuk nu ngaronom kanu panon.

"Geri gè pan lalaki. Sok modus meureun nya ka awèwè..."

Hanca

REDAKTUR : Kiwarta

Sudah saatnya bangkit dari keterpurukan...