Pitutur - Balég Tampélé

BALÉG TAMPÉLÉ

Ku : Yani Komaryani, S.Pd

NAON anu disebut balég tampélé téh?

B

alég tampélé nya éta budak remaja anu kakara ngalaman bogoh/nyaah ka lalaki anu srék jeung haténa. Biasana tara nepi ka tuluy karawin ngan ukur heuheureuyan diajar resep kapasanganana. Tapi sok aya ogé anu nepi ka jadi jodohna, ngan sok kahalangan kusababaraha taun. Umpama mimiti mikaresep téh basa keur di SD kelas 6, pléng baé paturay papanggih deui di perguruan tinggi,  bari masih pada pada lengoh. Maranéhna ngumbar obrolan jaman maranéhna keur di SD, jadi aringeten keur jaman cinta monyét, malah sok ayan nu nepi ka nyambung deui. Masa balég tampélé téh masa transisi, anu kudu leuwih ati-ati, sabab dina haté keur kitu mah sok loba lamunan fatamorgana, anu dina kanyataanana mah teu kitu. Sakapeung mah sok aya rasa keuheul mun aya anu ngadeukeutan manéhna nu dipikanyaah, padahal éta téh ukur babaturanana, malah dina haténa ogé sok nanya kadirina sorangan, naha nya, bét kitu? Jeung réa-réa deui.

Ari paripolahna, mun awéwé sok mindeng ngeunteung jeung ngaluis leuwih ti biasana, lalaki gé pon kitu deui. Hayang katémbong nyentrik, malah sorana ogé rada robah jeung sok hahariringan di kamar mandi. Ieu mangsana pancaroba, hal ieu gumantung kana atikan kolotna. Sabab tingkah polah nu jadi anak keur umur sakitu mah sok aya negatipna jeung aya positipna. Diantarana sok wangkélang kakolot, ngedul kana gawé, horéam mantuan indung, karesepna ngarumpi, mun dikamar gawéna ngan nyieun puisi puisi ti dituna mah jeung nyieun agenda cénah...... Kumaha tindakan nu jadi kolot?... tah mun nu manggih hal nu kitu tong dicarék, tapi tong diantep deuih kurang hadé...... éta negatipna, sok aya bédana rada parigel ngapalkeun boga rasa tanggung jawab, sabab boga rasa éra komo mun nu dipikaresepna mah batur sakelas sigana sumanget lantaran sieun wirang mun kanyahoan euweuh kabisa mah éta nu disebut positipna. Didieu nu jadi kolot kudu super aktip dina nalingakeunana ngarah teu kacolongan, sabab mun salah dina mangsa keur balég tampélé, sok kadalon-dalon nepi ka dewasana teu saeutik kolotna ngarasa gagal ngawarah nu jadi anak,  nu leuwih parahna mah kabawa nepi ka kolot éta kalakuan téh. Auzubillahimmindzalik.

Jadi peran anu jadi kolot didieu kudu surti, indung/bapana kudu deukeut kana haté anak nu keur menter balég, kudu loba rangkulan kadeudeuh jeung nasihat nu teleb kana lelembutanana. Nu dipalar ngarah jadi patokan dina hirupna, ngagedéan haténa, kuat kepercayaan haténa yén indung bapana kacida nya’ahna jeung melangeunana. Najan sakumaha resepna ceuk napsu maranéhna diluareun imah, anu patali jeung sipat mangsa rumajana, maranéhna moal sologoto, bakal bisa ku ngabédakeun mana nu hadé jeung mana nu goréng, moal wani ngarempak fatwa indung/bapa anu dijadikeun tempat ngabudalkeun balabuh haténa, kuat kapercayaan kakolotna, yen indung bapana téh konci sawarga pikeun dirina. Ieu téh mangrupakeun pancén indung/bapana anu pangbeuratna nyanghareupan anak dina mangsa anak timimiti balég tampélé nepi ka dewasa. Matak dawuhan ALI bin ALI THOLIB : “ATIK ANAK-ANAK MARANÉH KUNU HARADÉ JEUNG WARAH MARANÉHNA SOPAN SANTUN”.

Atik anak aranjeun ku wasiat aranjeun jeung ku paripolah aranjeun. Lamun éta budak téh mikaresep / dipikaresep ku anu saluyu jeung indung bapana tangtu ieu mah moal hésé tinggal ngaping jeung ngaduakeun sangkan jadi jodo nu dipikarido ku Alloh. Tapi lamun nu dipakaresep / mikaresep teu sapuk jeung kolotna tangtu ieu téh bakal beurat, bakal jadi katunggaraan pikeun maranéhna. Kumaha cara ngalelemuna sangkan ulah tulus ka jalma éta? Padahal ari jalma keur kasmaran mah tara beunang dicarek kalahka sok bedegong ka kolot, wani ngejat ti kolot, demi bebenerna téa.

Éta sababna timimiti balég tampélé kudu geus di dasaran ku agama, ngarah ngarti kumaha akibatna anu teu diridoan ku indung jeung bapana, élmu jeung imanna jadi tanaga anu kuat pikeun moal maksiat. Sabab ari cinta sajati mah teu kudu di iket ku tali perkawinan waé, lamun éta jodona ti Gusti engké ogé moal kamana-mana deui, tapi lamun teu jadi jodona kudu dianggap éta téh putusan ti Gusti nu nya’aheun ka mahluqna.

Dina waktu keur balég tampélé egois diri sok ngaronjat embung katitih ku batur najan ku dulur. Sifat nu kawas kitu geuwat di tamalirkeun, lebah mana urang kudu egois, hayang meunang sorangan, jeung palebah mana urang kuduna ngelehan manéh. Anu penting usahakeun sing jadi jalma anu meunang mangfaat keur batur tur teu nyusahkeun.

Lamun geus ngarasa awak téh keur balég tampélé atawa keur mentér balég, perhatikeun perkara anu positip perkara anu teu aya guanana atawa saeutik gunana kudu ditinggalkeun, lobakeun sujud sholat jeung ngadu’a ka Alloh.

“Tegas pisan pangbagjaan jalma nu tara maliré ka anu taya guna manfaatna.” Naon sababna perlu hirup nu kapositifan, sabab hirup di dunya ngan sakali, awéwé lir seperti kertas karbon lamun geus dipaké ngetik sakali, sok teu bisa dipiceun tapakna. Lamun noda, moal bisa dipiceun, najan disumput-sumput harga diri mah moal utuh deui, ruksak ku pamolah sorangan. Kusabab kitu dina mangsa keur balég tampélé, kudu resep nyuprih élmu agama, deukeut jeung ulama, babakti sing hadé ka kolot, senangkeun haténa ngarah dipikanyaah ku kolot, ulah tojaiyah teu sapuk jeung kolot, malah teu cocok jeung agama.

Nalika Ibnu Abbas aya dipengkereun nabi ngandika, “IEU ANAKING RAKSA KU HIDEP AGAMA (PARÉNTAH) ALLOH, ENGKÉ ALLOH BAKAL NGARAKSA HIDEP, RAKSA KU HIDEP AGAMA (PARÉNTAH) ALLOH, HIDEP BAKAL MANGGIHAN PANGRAKSANA ALLOH DIHAREUPEUN HIDEP.”

“JEUNG LAMUN HIDEP RÉK BOGA PAMÉNTA, PRAK GEURA MÉNTA TÉH KA ALLOH JEUNG LAMUN HIDEP MÉNTA TULUNG, PRAK GEURA MÉNTA TULUNG TÉH KA GUSTI ALLOH.”

Lamun umur geus meujeuhna balég tampélé : 1. Hidep kudu nyuprih élmu, mindeng duekeut jeung ulama ngarah meunang élmu pangaweruh agama, bisa ibadah bari husu bisa ngadu’a bari tawadlu, 2. Hidep kudu hadé ka kolot, hidmat ta’at kana nasehatna, geusan ngahontal karidoan Alloh, insyaf Alloh jauh tina mamala diri, meunang panangtayungan ti Alloh. 3. Hidep kudu junun nyiar élmu pangaweruh umum jeung agama, ngarah pinter bari hadé akhlak élmu hidep bakal mawa bagja dunya aherat...... Amin. Caag.

REDAKTUR : Kiwarta

Sudah saatnya bangkit dari keterpurukan...

Subscribe to receive free email updates: