NGAGUAR PANGALAMAN KATUKANG - KANG ATEP KURNIA

Potrét di Pabrik

Doc_Pribadi

H

iji mangsa di lembur, kurah-koréh kana pabetékan, ana goréhél téh kliseu sagulung di tengah-tengah majalah “Manglé”. Barang dicaangan bréh potrét jaman keur buburuh di pabrik tékstil (1998-2006). Mani asa manggih nanaon mah boa, atuda poho-poho acan. Nu inget téh harita, sigana dina taun panganggeusan digawé di dinya, kungsi aya acara wisata ti pabrik ka Ancol, Jakarta. Duka nginjeum ti saha, kamérana. Nu sidik, samulang ti Ancol téh, basa kabagian gawé “shift” peuting, ngadon popotoan hareupeun mesin cepengan.

Mesin nu kudu dijagaan téh nya badag nya panjang. Ngaranna “beaming”, sawaréh nyebutna téh “booming”, nu ngisarahan istilah keur solobong beusi nu ceulian pikeun ngagulung benang nu dipanteng tina “beam-beam” sagedé beuteung munding sarta dibariskeun ti hareup ka tukang. Mesin “beaming” téh mun dina alat tenun bukan mesin (ATBM) mah “mihané” téa, nyaéta nataharkeun benang keur nyieun lungsi. Lungsi téh benang keur ka panjangnakeun engké dina prosés ninun, sedengkeun benang nu ka gigirnakeun disebutna pakan.

Pagawéan ngajaagaan mesin “beaming” téh kasorang ti taun 1999 nepi ka pungkasan di pabrik. Da ari gawé mimiti mah purah ngepél jeung beberesih rohangan mesin “weaving” atawa mesin tinun. Aya dua lokasina, dipélna salokasi séwang jeung babaturan nu sarua bagian “cleaning service”. Sanggeus rérés beberesih, ngadon nyonyorong roda, nyokotan “majun”, runtah tinunan. Lantaran ninunna maké mesin “Water Jet Loom” (WJL) alias mesin tinun nu nepikeun pakanna ku cai, atuh majun téh baraseuh, ngalucur. Nepi ka dina roda nu sok ditilaman heula ku palastik téh sok ngumplang ku cai campur kanji. Sup-sup waé majun téh kana karung jeroeun roda. Gurudug dibawa ka gudang tempat neundeunna.

Enya ku wasilah potrét, élingan téh bet narémbongan deui. Bruh-bréh “beam-beam” nu ngabaris bérés hareupeun mesin “beaming”. Katrol ku sok disada kékérékékan ana dipaké naékkeun “beam” eusi benang kana dudukanana. Nu tuluy dédéngéeun nepi ka ayeuna mah sora ngahiungna mesin “Two-For-One Twisting” (TFO), paranti ngalilit benang sangkan wangunna bisa jadi “s” atawa “z”. Atuda nyantong pisan, sasat gigireun pisan mesin cepengan gawé. Kétang mun sepi jempling kawas ti peuting mah, ti lembur ogé sakapeung mah sok ngadéngé hawar-hawar baé mah.***

REDAKTUR : Kiwarta

Sudah saatnya bangkit dari keterpurukan...

Subscribe to receive free email updates: