WARTA PUSTAKA SUNDA : ZONASI

Z O N A S I

PUSTAKA SUNDA – Warta Sunda Onliné.

A

yeuna nuju usum ngagujrudkeun sistem énggal kanggo seleksi lebet sakola SMP/SMA nu disebat 'zonasi'. Sae panginten ari pamaksadanna mah, nanging numutkeun sim kuring mah sistem eta teh asa "ngawang-ngawang" upami diterapkeun ayeuna di Indonésia, duka upami di Finlandia mah. Kadinya waé pan nuduhkeuna téh menteri Muhajir mah.

Upami konteksna "zonasi di Jakarta wungkul", panginten tiasa dilarapkeun da SEBARAN SAKOLANA tos relatif merata sareng lumayan seueur: Nu caket, nu rada tebih, nu pinter, nu prasejahtera seueur nu katampung.

Upami ruang lingkupna 'luar Jakarta', tong tebih-tebih, sapertos Kabupatén Bandung, pan sebaran sakolana teu rata. Urang Bandung kalér ti kapungkur ngandelkeun sakola SMPN/SMAN negeri nu aya di kota, da caket. Ari nu gaduh Kabupatén, duka dimana nu pangcaketna. Numutkeun Google map mah, SMPN kagungan kabupatén pangcaketna aya di Antapani sareng Cileunyi. Pemda Kabupatén Bandung duka aya rencana duka henteu kanggo ngabangun sakola ditatar kalér. Bayangkeun wé, budak SMP ti Taman IR Juanda ka Cileunyi, paéh mantén di jalan atuh saméméh nepi. Éta gé mun katarima.

Antukna, barudak nu parinter sareng nu 'rada' parinter siga nu dipaksa ditakdirkeun kedah janten siswa sakola swasta. Da sanaos aya porsi 5% ogé, daya tampung sakolana terbatas pan. Akibatna karunya ka barudak nu tos toh-tohan diajar supados NEMna ageung, éléh ku barudak nu nyéépkeun waktosna maén game onliné PUBG jeung sajabana. Barudak baong tur males tiasa sakola mirah dibiayaan nagara. Ari barudak bageur harepan bangsa nu garaduh rencana jelas, kalahka disilih ku nu teu gaduh rencana serius, nu ukur hoyong nyakuan ijazah SMA jang modal ngalamar alakadarna. Dimana prinsip "reward and punishment"? Teu adil pan. Taun payun mah gampil upami hoyong katampi di SMP/SMA negeri téh: Ngontrak we caket sakola, teras ngalih KK. tumetep mah dimana wé nu penting KK ngalih. Budakna gé, keun wé ulin waé ogé, keun we maén game onliné terus ge. Nu penting KK aya di radius kurang ti sakilometer ti sakola. Pasti katarima.

Muhun, adilna mah sadayana disubsidi, nanging ngémutkeun kamampu pamaréntah, nu disubsidi dipilihan pan. Tah teu adilna téh dina masalah milihna, barudak nu tebih ti sakola "teu dipasihan kasempetan kanggo tarung makalangan/BERKOMPETISI sacara fair ngaraih sakola negeri. Siswa nu tebih sapertos tos di'fait-acompli', dikhususkeun kedah janten siswa swasta. Leuheung upami sakola swasta nu waragadna kahontal aya di wewengkon maranéhna, upami teu aya kumaha? Panginten kolotna ge moal tiasa deui ngabongbolongan kieu, "Jang, hidep diajar nu rajin nya, engké ogé dibiayaan ku pamaréntah mun junun mah." 

Menteri nu hiji éta mah gawéna ngawang-ngawang wé ti mimiti diangkat. Awalna gebrakan 'full day school' ayeuna zonasi. Punten murang-maring di dieu. Karunya wé ka barudak di lembur maneuh nu nuju sarumanget diajar tapi teu tiasa lebet ka sakola negeri sareng teu mampu lebet ka swasta, kawon ku nu tukang mabal, nu kacanduan PUBG nu bumina caraket ka sakola negeri. Pami kieu teras mah, "Gone are the days of the glorious story of poor village kids becoming successful due to cheap education". Punten nginggris, supados kerén. "Moal aya deui dongéng urang kampung bau lisung tiasa sukses janten pejabat lantaran sakola junun tur mirah..."

Sok tah karomenan, ku urang kampung, ku urang dayeuh. Kumaha tah?

Kintunan ti Ganda – Pustaka Sunda

REDAKTUR : Kiwarta

Sudah saatnya bangkit dari keterpurukan...

Subscribe to receive free email updates: