PELESIRAN : Hidden Valley Hills Nyaritakeun Raja-Raja Galuh Purba jeung Sunda Kuno - Bagéan 1

Hidden Valley Hills

Nyaritakeun Raja-Raja Galuh Purba jeung Sunda Kuno

Bagéan 1

Anto Sukanto

Keterangan Poto :

Prasasti Kuda Terbang zaman walanda Kuno Anno anu ditulis taun 1898 Masehi

Poé lebaran ka tilu, Juma’ah (7/6), Warta Sunda Onliné ngahaja ngadongdon ka wisata Legenda Karajaan Sunda Kuno. Pikeun ngabenerkeun cacaritaan aparat désa sawatara waktu katukang nu kawitna Galura rék ngaguar sasakala Gunung Cupu. Cenah mun badé ngaguar Gunung Cupu mah bisa leuwih anteb di tempat wisata Hidden Valley. Lantaran aya pakuat-pakaitna jeung Karajaan Pajajaran.

Basa nepika ka lokasi nu disebutna tempat wisata “Hidden Valley Hills” di Désa Cibodas Kecamatan Sukatani Kabupatén Purwakarta. Natrat katingal yén ditempat éta téh ayana tugu nu disebut “7 Pilar Legenda Purba Hidden Valley”. Lokasina di puncer nu luhurna sarua jeung Gunung Cupu di ketinggian 362 Mdpl téh, témbong sakurilingeunnana ti mimiti imah-imah (pemukiman) warga, jalur jalan Tol Purbaleunyi, areal pasawahan, pemandangan gunung-gunung, wahangan Citarum nepika Bendungan Jatiluhur.

Di lokasi éta, kasampak Pa Hendry Chandrawinata salaku Owner Hidden Valley Hills Purwakarta méré kasempetan keur ngawangkong jeung Galura ngeunaan kasang tukang ngadegkeun wisata legenda karajaan Sunda Kuno di lembur Désa Cibodas Kacamatan Sukatani, Kabupatén Purwakarta.

Dina wangkonangan Pa Hendry ngajelaskeun yén lahan nu dipimilik ti taun 2014 éta téh nalika rék ngawangun bangunan keur tempat istirahat pribadina. Manggihan tugu atawa prasasti buatan zaman walanda Kuno Anno anu ditulis taun 1898 Masehi nyaéta manggih prasasti Kuda Terbang kondisina geus ruksak nu aya diluhureun batu bari jeung anting-antingna geus laleupas amarayah di unggal léngkob nu ayeuna disebut wewengkon Cianting. Patula-patalina anting-anting éta téh jeung carita Gunung Cupu.

Ku kituna nepika sim kuring ngawangun ieu wahana wisata téh, “dumasar kana ayana wates abadi ti Karajaan Sunda jeung Karajaan Galuh Purba nu diapit ku Wahangan Citarum, Gunung Cupu (362 M), Gunung Parang (963 M) jeung Gunung Bongkok (975 M),” pokna lalaki 72 taun Insinyur Sipil Parahiyangan. 

Sedengkeun visi misi Hidden Valley Hills (362) nyaéta “Negeri dongéng diatas awan terangkum indah sebagai serpihan surga di Purwakarta, terlahir dari inspirasi Tugu Belanda Kuno Anno 1898 ini. Hidden Valley Hills mempunyai ketinggian 362 Mdpl yang sama dengan Gunung Cupu. Dengan view pegunungan 360^O Sungai Citarum, Gunung Bongkok, Gunung Parang di depan kita adalah batas abadi dari Kerajaan Sunda dan Kerajaan Galuh Purba.”

Kajaba kitu tilu gunung boga carita masing-masing saperti Gunung Cupu (362) nyaritakeun :

Sasakala Gunung Cupu

Kacaritakeun aya tujuh widadari ti kahyangan anu resep ngalanglang ka bumi.  Maranéhna resep kokojayan bari silalanglang di hiji talaga anu hérang caina.

Dina hiji soré, waktu tujuh bidadari keur anteng kokojayan di talaga, kurunyung jajaka nyampeurkeun ka éta tempat.

“Lakadalah, ieu widadari anu dicaritakeun ku urang lembur téh!” pokna ngagerendeng sorangan. Tuluy manéhna nyumput di satukangen rungkun nu ngababadeg di sisi talaga. Panonna mencrong ka tengah talaga, ngawaskeun parawidadari anu teu nyahoeun aya jalma nu ngintip.

Sanggeus rada lila ningalikeun paripolah parawidadaari, kereteg dina haté éta jajaka aya niat rék ngiwat pakéan widadari anu ngalumbuk di luhur batu sisi talaga. Sanggeus kitu manéhna keketeyepan nyampeurkeun pakéan, tuluy dicokot sapasang.

Waktu widadari réngsé mandi, nu séjénna ngabelesat ka jomantara, baralik deui ka kahyangan. Iwal nu saurang kalah ceurik balilihan lantaran pakéan kahyanganna leungit. Si Jajaka tuluy nyampeurkeun, “Kunaon putri bet nangis di dieu,” pokna.

Widadari téh kagét, bet aya jajaka di tengah leuweung. Ges teg waé sangkaanana, yén pakéan kahyangan tangtu diiwat ku manéhna. Sanggeus ditanyakeun, si jajaka ngaku yén pakéan Nyi Putri aya dimanéhna.

“Ku kaula dibikeun, asal Nyai Putri daék jadi pamajikan kaula.” Ceuk si jajaka.

Lantaran teu aya deui jalan, kapaksa Nyai Putri téh narima kana panglamar si jajaka pikeun jadi pamajikanana.

Gancangna carita, dina hiji mangsa waktu Nyi Putri rék nyokot paré ka leuit lantaran rék nutu béas, manéhna manggihan pakéan kahyangan anu baheula leungit téa. Geus waktuna manéhna mulang deui ka kahyangan. Ku kituna, rap waé éta pakéan dipaké sarta tuluy bébéja ka salakina anu harita aya di kebon.

Si Jajaka teu bisa ngahalangan kana kahayang pamajikanna. Lantaran ceuk pamikirna, mana kapanggih ogé pakéan anu baheula disumputkeun téh hartina geus waktuna manéhna papisah jeung pamajikan.

Sanggeus kitu mah belesat waé Nyi Putri téh balik ka kahyangan ninggalkeun anak jeung salaki di bumi. Ngan, saméméh mulang, manéhna ninggalkeun cupu wadah perhiasan pikeun cecekelan keur anakna, bisi dina hiji mangsa hayang panggih jeung nu jadi indung.

Nepi ka ayeuna cupu titingal Nyi Putri téh cenah aya kénéh di hiji gunung. Ceuk nu kawénéhan mah geus biasa unggal aya katumbiri sok aya widadari anu ngajugjug ka éta gunung pikeun nepungan nu jadi anak jeung salakina.

Lila ti lila, gunung tempat nyimpen cupu téh katelah waé Gunung Cupu nu aya di wewengkon Sukatani.    

Nilik tina éta carita sim kuring nepi ka taji tur ngadegkeun destinasi wisata Legenda Purba nu diaranan Hidden Valley Hills. Malah mandar nepika ngawangun 7 Pilar Legenda Purba Hidden Valley Hills éta téh pikeun ngirut wisatawan nu husus ngaguar ngeunaan carita sajarah Sunda. Pokna Pa Hendry.

Unggal pilar éta téh dipasang tulisan gantar kakaitna jeung carita-carita legenda kuno saperti Karajaan Hindu Purba diantarana Karajaan Salaka Negara : Teluk Lada Raja Dewa Warman Resi India (130 – 352 M), Karajaan Tarumanegara Bekasi (358 - 669 M) palaputrana Jaya Singawarman (359 - 382 M), Dharmaya Warman (382 - 395 M), Purnawarman (395 - 434 M), Wisnu Warman (434 – 455 M), Indra Warman (455 – 515 M), Chandra Warman (515 – 535 M), Surya Warman (535 – 561 M), Kerta Warman (561 – 628 M), Lingga Warman (628 – 669 M).

Dina hal ieu mah yén Karajaan Tarumanegara anu terahir téh nepi runtag jadi dua nyaéta Karajaan Galuh nu rajana Wretika Dayun sarta Karajaan Sunda rajana Tarusbawa.     

Lian ti éta ayana Karajaan Kutai di Tenggarong, Muara Kaman + 400 M palaputrana Raja Maharaja Kudunga (Hindu), Asya Warman (Budha), Mulawarman, Dharma Setia.

Sedengkeun Karajaan Galuh Purba Karang Kamulyaan ti mimiti 612 – 1579 M nyaritakeun Karajaan Wreti Kadayun 612 – 702, Mandi Minyak 702 – 709 M, Sena 709 – 716 M, Purbarosa 716 – 723 M, Sanjaya 723 – 732 M, Permana Dikusuma 732 M, Tamperan Barmawijaya 732 – 739 M, Ciung Wanara 739 – 783 M, Prabu Dharma Sakti 783 – 799 M, Prabu Kertajaya 799 – 806 M, Prabu Brajanegara 806 – 813 M, Prabu Linggabumi 813 – 852 M, Prabu Gajah Kulon 852 – 891 M, Prabu Dewa Niskala 1475 – 1482 M, Prabu Siliwangi 1482 – 1521 M.

Lain deui sareng Karajaan Sunda Galuh Bogor 669 – 1579 M ti mimiti Raja Tarus Baya nepi ka Prabu Surya Kencana.***

REDAKTUR : Kiwarta

Sudah saatnya bangkit dari keterpurukan...

Subscribe to receive free email updates: