#NetSofyanPost - NGANTEURKEUN
#NetSofyanPost
NGANTEURKEUN
|
H
|
arita téh pasosoré, poé Ahad (24/02/2019) basa kuring keur
moncongok lalajo final proliga. Di luar hujan girimis, ana jelegér téh gelap
tarik pisan. Ceuli asa ngajelengéng, tv pareum. Sakedapan papelong-pelong jeung
indung budak bari babacaan. Reuwas kacida. Teu lila sora Pa Rasim tatangga
gigireun imah ribut kawas aya kajadian pikareuwaseun. Tuluy dilongok horéng
kabel tv ngebul arucutan. Listrik ogé pareum. Cenah waktu aya gelap téh panto
imahna muka. Sa RT mah nyarebutna téh Si Bapa jeung Si Ema wé ka tatangga
gigireun imah téh. Si Bapa tukang bas ahli kayu, ari Si Ema tukang ngaput. Si
Bapa mah unggal poé Saptu mulangna téh.
Wanci magrib
nu biasa ramé ku sora barudak nu pupujian di masjid hareupeun imah ngadadak
jempling. Taya nu adan deuih. Geuning ampli masjid ogé pareum. Réngsé salat
berjamaah Si Bapa ka imah pupuntenan ménta listrik. Milu nyolok ti lampu luar.
Nya di tengah imah pisan uyak-uyek ngoprék obéng jeung kabelna téh. Subuh
saperti biasa babarengan ka masjid. Di jalan sasalaman bari silihdungakeun sing
séhat. Puguh Si Bapa téh keur batuk. Ari kuring karék béak obat ti dokter.
Minangkana mah eungkeut-eungkeut maju ka cageur. Ceuk indung budak, Si Bapa
indit digawé ka Bandung rada beurang. Kungsi patanya basa keur sasapu di buruan
cenah.
Puguh asa ka
kolot sorangan ka Si Bapa téh. Lamun kuring pareng ka luar kota atawa ngéndong
teun mitoha nya tatap-titip téh ka Si Bapa. Atuh Si Ema ogé sarua bageurna.
Lamun teu dipaksa mah tara nampa upah ngaput atawa permak sautak-saeutik.
Sakulawarga balageur pisan. Teu aritungan ku tanaga. Kungsi nyieun lomari buku
tohaga naker embung dibayar lamun teu dipaksa mah. Keur jaman usum ngaronda nya
jeung Si Bapa ngabalad téh. Lamun Persib maén sok tibuburanjat ngabéjaan,
ngajak nobar di imahna. Puguh teun kuring mah teu katangkep da maké parabola.
Nobar téh sok disuguhan téh manis jeung kulub hui.
Saptu soré
(02/03/2019) basa kuring keur di Limbangan meunang béja Si Bapa dirawat di IGD
RSUD Sumedang. Cenah kaserang jantung, keur digawé karasana téh. Kungsi dibawa
ka rumah sakit di Bandung tapi kulawargana ménta dibawa ka Sumedang. Kabeneran
Ahad isukna téh mitoha jeung indung budak rék ka Purwakarta. Nya badami kumaha
lamun balik ti Purwakarta langsung ka Sumedang urang ngalayad. Kuring mah megat
di lawang komplek wé. Sapuk caritana mah.
Ahad subuh
saacan adan bapa kuring ngahudangkeun aya telepon. Horéng indung budak nu
nelepon téh. Bari nginghak ngabéjaan Si Bapa ngantunkeun jam 12-an. Meunang
béja WA ti anakna Si Bapa. Puguh wé asa teu percaya mimitina mah. Sanggeus
salat gura-giru balik. Milu nyalatkeun mayit di masjid jeung nganteurkeun
ka astana. Loba warga komplék nu nganteurkeun padahal rada jauh astana
téh.
Geus ampir
saminggu unggal salat subuh berjamaah di masjid asa sepi pisan. Unggal diitung
teu lengkep kawas sasari. Da puguh bejamaah subuh mah saeutik, éta-éta kénéh.
Sanggeus wiridan mah sok langsung baralik da lolobana mah digarawé. Kiwari
jamaah masjid rutin téh ngurangan. Geus moal aya deui balad berjamaah anu
pangdeukeutna. Nineung ku sorana nu agem lamun keur adan. Matak nineung ku
kaparigelanana urusan uma-omé. Ngan kari waasna. Mugia Pa Rasim husnul khotimah
ditampi iman islamna. ***
Tanjungsari Sumedang,
07/03/2019
0 Response to "#NetSofyanPost - NGANTEURKEUN"
Posting Komentar