MITRA MEDAR - MUSLIM MUNGGARAN Ku : Dadan Sutisna

MUSLIM MUNGGARAN
Ku : Dadan Sutisna

"B ukanlah hal baru bahwa banyak uang yang dihasilkan dari agama. Suku Quraisy abad ke—6 mengetahui hal ini sama baiknya dengan télévangélis (pengkhotbah di télévisi) di masa modérn. Serupa dengan pasar saham Wall Street, kelompok élité Mekkah menjalankan kota ini layaknya oligarki, dengan kekuasaan berada di tangan segelintir orang kaya. Aksés selalu dimédiasi, dan selalu membutuhkan biaya .... Bisnis meréka adalah keimanan, dan keimanan meréka ada pada bisnis." (Muslim Pertama, kaca 53)

Cutatan di luhur téh, gambaran kaayaan Kota Mekkah dina abad ka-6, saméméh Kangjeng Nabi Muhammad nyebarkeun Islam. Nu disebut "iman" dina jaman jahiliah, tangtuna gé nyebah berhala. Jeung lain urusan iman-iman teuing deuih, da dina émprona mah apan maranéhna parebut kakawasaan, papada hayang ngeukeuweuk (monopoli) sakur nu bisa ngadatangkeun rajakaya. Cindekna mah, ngajual kayakinan keur kapentingan dunya.

*

Buku nu ngaguar riwayat Kangjeng Nabi Muhammad SAW téh réa pisan. Lalakon Kangjeng Nabi mah hamo aya saatna, tangtu dicaritakeun sapanjang jaman, jeung sageuy mun nu ngaku muslim nepi ka ngamomorékeun. Dina sawatara buku, bisa jadi aya pangaweruh anyar, atawa katerangan séjén pikeun babandingan jeung buku lianna.

Ieu buku gé méré tilikan séjén. Malah boa perlu ngawahan heula, lantaran nu nulisna apan bangsa Yahudi. Waktu mimiti maca ieu buku, sabisa-bisa nyingkirkeun heula ka-Yahudi-anana, nyuaykeun prasangka yén ieu mah hasil panalungtikan nu bisa dipertanggungjawabkeun sacara kaélmuan. Buku "Muslim Pertama" (judul asli: "The First Muslim: The Story of Muhammad"), ditulis ku Lesley Hazleton, warga Amérika, jurnalis Timur Tengah nu museurkeun tulisanana kana sual agama, sajarah, jeung pulitik.

Geura urang bandungan heula daftar pustakana. Waktu nulis ieu buku, Hazleton maké rujukan primér nyaéta Alquran (lima tarjamahan basa Inggris), "Sirat Rasul Allah" (Ibnu Ishaq), jeung "Tarikh ar-Rusul wa-al-Muluk" (At-Tabari). Ari sumber sekundérna mah réa kacida, leuwih ti 120 judul buku.

Ieu buku ditulis maké gaya novél, dibuka ku kajadian pangpentingna dina sajarah Islam: turunna wahyu ka Kangjeng Nabi. Dina bagian-bagian awal geus mimiti karasa wandana, Hazleton ngudag détail nu arang kagambarkeun dina buku-buku lianna. Ngawincik kaayaan bihari téh mémang lain gawé énténg. Tong boroning dina abad ka-6, dalah kaayaan tilu abad katukang gé hésé kagambarkeunana mun teu dibarung ku sumber tinulis nu lengkep mah. Hazleton gé katémbongna mah engeuh yén dina ieu buku inyana keur adu hareupan jeung kaimanan agama lian. Nu matak tilikanana leuwih kana sual-sual kamanusaan (human interest), sajarah, jeung psikologi nu jadi kokojo kaélmuanana.

Lantaran ditulis dina wanda novél, lebah nyaritakeun kaayaan hiji tempat atawa kajadian téh éstuning diwincik pisan, najan dina sawatara bagian mah aya kesan kaleuleuwihi. Ngagambarkeun Guha Hira gé apan nepi ka sababaraha kaca. Boa ieu téh keur ngayakinkeun (pangpangna keur nu maca luareun ageman Islam) yén sakur nu karandapan ku Kangjeng Nabi téh dirojong ku data faktual. Bagian-bagian nu ditulisna nyosok jero téh bisa ngahudang émpati deuih. Upamana, sageuy mun teu milu ngangres ngabandungan lalakon Muhammad mangsa keur budak, lahir dina kaayaan yatim, tuluy nyaksian ibuna ngantunkeun. "Dina umur genep taun, anjeunna geus jadi yatim piatu, hiji-hijina warisanana téh ukur kateupastian ngeunaan tempatna di ieu dunya," kitu cék Hazleton mungkas bab lalakon Muhammad nu dikantunkeun ku ibuna.

Ieu buku pinuh ku analisis deuih. Méh dina unggal kaca Hazleton méré tafsiran jeung analogi kana cutatan sajarah dina éta jaman. Babandinganana gemet, najan sakapeung aya rasa hiperbol, contona lebah ngabandingkeun bisnis bangsa Kurés di sabudereun Kabah jeung Wall Street. Patali jeung analogi téa, bawirasa keur sabagian nu maca mah aya nu matak kerung. Hazleton bangun hayang némbongkeun yén pangaweruhna kana sajarah kawilang lega.

*

Jadi naon nu katéwak sabada maca ieu buku téh? Teu kurang teu leuwih, bet ngurunyung deui patalékan: sakumaha deuheusna ka Kangjeng Nabi Muhammad SAW? Patalékan nu sakapeung mah hésé ngajawabna, dalah keur sadirieun sorangan. Sanajan ti jauhna kénéh ngaku jadi umat anjeunna tur netepkeun dina haté yén Kangjeng Nabi téh jungjunan alam nu hamo aya cédana, tapi pikir mah sok keuna ku owah gingsir. Ngaku deuheus ka Kangjeng Nabi boa ukur lalambé, upama haté jeung lampah remen pasalia. Teu ngabibisi, dalah cék ajengan gé, ieu téh aya patalina jeung iman; ari iman apan sakapeung beukah sakapeung ngariut, gedé jeung leutikna geus jadi sipating manusa, tapi nu penting mah angger buleud, henteu bénjol, semplék, komo nepi ka bejad mah.***

Pangémboh teu pati penting:
Geus rada heubeul terang kana ieu buku téh, ti Kang Ajip (Ajip Rosidi). Ti baheulana anjeunna mah koléktor buku-buku riwayat Kangjeng Nabi, dina hiji waktu nyaritakeun ieu buku (vérsi basa Inggris), alus cenah mun ditarjamahkeun kana basa Indonésia. "Tos aya nu narjamahkeun," pok téh sabada kurah-koréh kana Google.

REDAKTUR : Kiwarta

Sudah saatnya bangkit dari keterpurukan...

Subscribe to receive free email updates: