Pustaka Sunda - Pangalaman Abah
Ku ayana sasalad modél ayeuna, jadi loba ngariung jeung ngobrol téh jeung keluarga. Kaasup ngobrol jeung Abah (sesebutan ka pun bapa).
Salah sahijina ngadongéngkeun pangalaman, mangsa keur budak.Ari nini téh, ngurus budakna téh salapan. Tah lamun bagéan dahar téh, geus boga hancengan séwang-séwangan. Lain ukur sangu jeung réncangna wungkul, tapi nepi ka mangkokna (Saurna mah tina taneuh, tapi hérang), ogé boga ciri nu Si A Si Bna.
Lamun ku nini ditinggalkeun ka kébon téh sok ditunda dina téténong. Kusabab geus boga wadah, jadi tara nepi ka pacorog, atawa pahili.
Tah, dina hiji poé nini keur ka kebon. Nya hancengan sangu téh, ditunda dina téténong, pikeun ngawadang barudakna samulangna ti sakola.
Kacaritakeun marulang ti sakola, cuk-cek kana hancengan séwang-séwangan. Ari Wa Engkos, datangna téh pandeuri. Gawéna ukur kuralang-kuriling, bari nyenyekel beuteung. Tungtungna nagog, deukeuteun kandang embé. Ngadagoan Nini.
Saba'da lohor, torojol nini tas ti kebon. Ningali Ua nu pias bari nyekelan beuteung, langsung nalék : " Kunaon tuh manéh, gering?"
Nu ditanya kalah reumbay.
"Geus dahar acan?"
"Teu acan, da teu aya nu abi mah sanguna ogé."
"Lain euweuh, tuh wadahna diganti, da nu paranti manéh mah,
dina gérohan".
Tah didikan kolot baheula mah, nepi ka dahar ogé sina disiplin. Jeung ulah nyoba-nyoba mawa nu lain hakna.
#Net_DiajarNulisTris
0 Response to "Pustaka Sunda - Pangalaman Abah"
Posting Komentar