Mitra Medar : Bubuka Sapta Lawang
BUBUKA SAPTA LAWANG
Pun sapun ka Hyang Agung
Nu Nyipta Saptaning Dina
Ku Asma Welas tur Asih
Sumebar tresna Sang Maha
Rembes dina rasa urang
Jadi tanaga tohaga
Pikeun ngalakonan lakon
Nyungsi sajatinging diri
Ngawula ka Maha Yuga
Pun sapun ka Ratu Panungtung
Nabina para Anbiya
Imamna para Satria
Rosul Agung Sang Linuhung
Ogé ka sékésélérna
Teureuh galeuh trahing Syuhada
Nu lempeng dina jalanNa
Tara incah tina sunah
Angger nangtung
Jadi paseuk jagat liwung
Sholawat sinareng salam
Mugia dilelerkeun sapapaosna
Pun sapun ka Sang Rumuhun
Nu nyakséni laku para buyutputu
Yén kiwari seja ngabumi
Mtembeyan Hajat Bumi
Nyaliksik lebeting ati
Ngagali Wasiat Majeti
Muka tutungkusan rasa
Sangkan tresna
Sumebar ka saban rénghap
Jadi darah jadi balung
Jadi pamungpungan lawung
Demi Sapta Warsa nata
Ditata sangkan permana
Ditata sangkan permana
Jauh tina ketak nirca
Ekawarsa narékah ti manah ka manah
Malah mandar jadi cukang kawaluyaan
Laju ngadegkeun Gerbang Pertala
Uteuk nétra pangrungu, bayu
Amparan lemah, geni tur banyu
Mangkahadé masing hadé
Dina nata, niti, nété
Dwiwarsa ngawangun marga mimitran
Bale sawarga sakasang tukang
Pangauban berkah samanah
Ngaheuyeuk pageuh jeung deudeuh
Triwarsa ngabumi Majeti
Ngaroncé angin jeung héorna
Seuneu jeung gedurna
Cai jeung gulidagna
Taneuh jeung maneuhna
Sangkan lana digjayana
Caturwarsa nyakra lemah
Ngagurat urat munajat
Nitih rintih nyuprih wening galih
Ngagero totowong sédong
Tan katembong ku pelong lolong
Pancawarsa muka dangiang pepernian
Mangsa ngumbah eusi warangka
Susuci ajén wewesén
Sangkan gebur hurung ngempur
Nyaangan papada urang
Satwarsa wayah boboran
Nembrakeun kasinugrahan
Ngahayap saparakanca
Kadang warga sadayana
Hémpak merbayaksa
Hémpak saamparan tresna
Ditutup saptaning warsa
Ngertakeun bumi lamba
Majeti sing nyiki saati sajati
Lain kapling panitih jurig nyiluwuri
Lain paniisan jirim kunti nyisikudi
Majeti loka candradimuka
Nu pinasti bakal ngalahirkeun
Sajatina manusa
Majeti pamrih ajining hakiki
Masing lana digjayana
Bral Majeti Jengkar
Prung Majeti ngapung
Ku Kersana Hyang Agung
Ka karuhun nu ti kidul
Sékésélér palih kalér
Wangsa baraya ti wétan
Soko weweton ti kulon
Kum sakur tangtung nu ngarungrum
Nu ngancik di madhabpapat
Mangka hadir nyumponan pangakir Hempak jati komara tresna
Pangjiadkeun incu putu
Panyambung laku Hyang Buyut
Tatalén simpay mimitran
Seja ngaraksa ngariksa
Sangkan jaya salawasna
Sakitu nu kapihatur
Sakitu nu kapicatur
Mugi sing jadi ngabukur
Subur ma'mur salelembur
Subur ma'mur salelembur
Amin Ya Robbal 'Alamin
Muga Gusti Nangtayungan
: (Abah Sarjang)
