WARTA TI PLÉRÉD

Ciri Has Pléréd Lain Saukur Keramik

Tapi, “Sate Marangi, Pencak Silat Palérédan, Makom Karomah Mama Sempur sarta Seni Tari Kembang Panjunan”

“PLÉRÉD, ceuk Jujun Junaédi, salaku generasi kaopat ti pengrajin keramik Pléréd waktu ditepungan ku Warta Sunda Online, (29/11). Lain ukur keramik nu kakoncar téh. Ciri has lian ti keramik Pléréd ogé diantarana Sate Maranggi, Pencak Silat, wisata religi tur Seni Tari Kembang Panjunan.

Diantara ciri has Pléréd éta téh, sate marangi minangka nu jadi ciri. Nilik ti pihak pamaréntah mernah-mernahkeun pausaan sate marangi caket statsion Pléréd.

Sate Marangi

                                           

Minangka salah sahiji kuliner has Purwakarta, saté maranggi tangtu réa anu mikaresep. Warga anu daragang saté maranggi bakal katémbong di saban suklak-sikluk wewengkon Purwakarta, hususna di Kecamatan Pléréd jeung Wanayasa. Manakomo kiwari di Kecamatan Pléréd geus diwangun Kampung Maranggi, puseur warga Pléréd anu daragang maranggi. Ari perenahna peuntaseun Kantor Kecamatan Pléréd atawa gigireun Stasion Pléréd.

Di Kampung Maranggi, horéng anu daragang sate maranggi téh teu ukur hiji atawa dua, tapi aya kana dua puluhna. Anapon bédana saté maranggi di Pléréd jeung saté di wewengkon séjénna nyaéta lebah bungbu jeung kécap. Kapan di wewengkon séjén mah sate téh sok ku bungbu suuk baé. Katémbong bangku panjang tina awi, ngawangun hurup U ngurilingan anu dagang saté tengahing haseup anu mulek. Dina méja, kasampak aya sangu timbel anu dibungkus ku daun cau, acar bonténg, kécap, piring, saté maranggi sarta uyah.

Di Kampung Maranggi Pléréd, urang laluasa pisan naker kecap jeung acar bonténg ku sorangan. Malah upama sangu timbel jeung saté maranggina kurang, urang bisa ménta tambahan deui. Lian ti éta, urang teu kudu riweuh mesen, kari gék baé diuk dina bangku, saté maranggi langsung dibeuleum ku anu dagangna.

Sanggeus asak, saté maranggi laju diasongkeun. Tuluy urang kari muka sangu timbel anu masih dibungkus ku daun cau, gap kana saté maranggi, sok diteundeun luhureun sangu timbel, tuluy cur kécap, upama resep tambahan ku acar bonténg, tuluy kari am dahar. Moal teu matak deudeuieun, geura.

Daging sapi atawa domba dina saté maranggi ngahaja diteukteukan laleutik. Satiir saté maranggi kira-kira cukup keur sahuapeun sangu timbel. Sabot urang ponyo dahar saté maranggi, katémbong anu ngajualna mah terus baé meuleuman saté, kawas anu hariwang mun anu dahar ponyo tepi ka béakkeun saté maranggi.

Sedeng harga satiir saté maranggi kira-kira Rp. 1.300 – Rp. 1.500. Kawilang murah keur ukuran saté maranggi anu ni’mat. Lian ti éta, salah sahiji kaonjoyan (kelebihan) saté maranggi Pléréd téh muka méh 24 jam, ti isuk tepi ka pasusubuh. Ku kituna, para wisatawan bisa laluasa muru saté maranggi Pléréd dina waktu iraha baé.

Pencak Silat Palérédan

Pamaréntah jamanna Dedi Mulyadi kungsi ngayakeun kagiatan ngajaulkeun seni penca silat ka sakuliah dunya kalebet salapan nagara kungsi ngareuah-reuah acara Festival Bela Diri Dunia nu “Jejerna mah sangkan penca silat kasohor ka sakuliah dunya. Sim kuring saparakanca hoyong penca silat minangka khazanah béla diri téh tiasa diaku ku nagara-nagara di dunya.” Kitu basa Jujun nirukeun omongan Pa Dedi Mulyadi.

Penca silat téh nyindekel kana lima palsapah anu kudu dicekel pageuh ku para ahli penca silat. Éta lima palsapah téh nyaéta sumerah diri ka Gusti, silih hargaan ka sasama, cinta lemah cai, miboga sikep tigin, jeung sumanget ngawangun mimitran.

Kukituna nurutkeun Jujun, Jawa Barat jeung Purwakarta saenyana miboga seni penca silat anu has, nyaéta jurus Palérédan ti Pléréd jeung Syahbandar ti Wanayasa, wewengkon di pakidulan Purwakarta.

Tari Kembang Panjunan

Kalih ti éta Pléréd ogé dina widang seni teu kakantun jeung nu sanésna. Nya diwewengkon Paléréd mibanda Seni Tari “Kembang Panjunan” nu nyoko kana falasifah Kecamatan Pléréd nu ngndung harti kana Anjun (taneuh beureum).

Wisata Makom Karomah Mama Sempur

Dina wisata religi ogé Paléréd mibanda Makom Karomah Mama Sempur (KH. Tubagus Ahmad Bakri) téh minangka turunan Rosululloh SAW. Nepika kiwari tempat jarah ti nusantara hususna Jawa Barat.

Diriwayatkeun yén Mama Sempur lahir di Citéko, Pléréd, Purwakarta, Jawa Barat taun 1259 H atawa taun 1839 M, inyana ngarupakeun putera kahiji ti pasangan KH Tubagus Sayida jeung Umi.

KH Tubagus (Tb) Ahmad Bakri, leuwih dikenal sebutan Mama Sempur. Mama nu istilah basa Sunda tina kecap rama atawa Bapa. Di kalangan masarakat Jawa Barat mah, kecap Mama téh keur Ajengan atawa Kiai pikeun jujuluk Mama Ajengan atawa Mama Kiai. Sedengkeun Sempur téh hiji diantara Désa nu aya diwewengkon Kecamatan Pléréd, Purwakarta, Jawa Barat.

Kukituna, ceuk Jujun Junaédi, yén Kecamatan Pléréd téh lian ti kota keramik ogé kota nu kadua ti Kecamatan Purwakarta, Kabupatén Purwakarta tina sisi ekonomis. Payus pisan Pléréd unggal taunna muncul para pendatang pikeun ngadunasib pakasaban sewang-sewangan. Pon kitu deui ayana bank-bank swasta nu milu aub pikeun ngama’murkeur tur ngaraharjakeun masarakat diwewengkon Pléréd.

Lain deui nu kasauran ti pihak praktisi seni ogé pupuhu seni tari Kembang Panjunan, Néni Suantini, S.Pd nu kasangtukangna sarjana seni tari lulusan IKIP Bandung. Nyiptakeun Seni Tari Kembang Panjunan téh dirintis ti taun 2006 hasil gawé rancage ti Paguyuban Seniman Sunda Purwakarta (PSSP) nu harita digagas ku Otong Syamsudin (Alm) Penilik Seni Pléréd beh ditu, dibantos Ibu Edah nu ngagaduhan Lingkung Seni Citra Resmi Pléréd sareng sim kuring tur Eva Nurléla.*** Anto

REDAKTUR : Kiwarta

Sudah saatnya bangkit dari keterpurukan...

Subscribe to receive free email updates: