PANGARANG
KUMPULAN SAJAK
Pihatur Pangarang
Sugrining puji ka Gusti nu Maha Suci pamugi jadi ciri nu babakti ka Hyang Widi, sukur kanu Maha Gofur nu jadi balur sampulur pikeun badan sakujur, puja kanu Maha Kawasa nu jadi tanggara raga manusa taya daya taya upaya anging kersa mantén-Na.
Rehing ieu tulisan rengsé dipigawé.
Laksa tamada ka :
Sakur nu kasabit nami, saban nu kasebat asma. Sakur nu kasabit nagari, saban nu kasebat nagara. Paralun malum anu kasuhun, wening galih nu dipamrih, dipalar rido manahna. Paralun narutus gunung, palias narajang alas, amit-amit nyungsi pasir. Tabé pun!
Rewu nuhun ka :
1. Nu pasti ka Gusti
2. Baping, Eming
3. Nyi Dedeh Faridah (Indung budak) nu sabar ngaulaan.
4. Rd. Rangga F. Nitinagara (Si Jalu) nu haben ngaganggu.
5. Utun inji nu masih kénéh na kandungan indungna (3 bulan)
6. Dulur nu papat kalima uing.
7. Karuhun, Guru, Sesepuh, Alim Ulama... kum
8. Sakur dulur, batur, baraya, sanak pamili, kadang warga nu nyampak dimana-mana, nu katata nu katata, kum teu diwiji-wiji.
Mugi katampi ieu pangbakti.
Rumasa wungul puraga tamba ka dengda. Mun di lembur kayu randu, mun dileuweung kayu dangdeur, dipaké pamikul bengkung, dipaké pangerét bingkeng dipaké pancar teu ruhay, dipaké tihul teu hurung. Tayohna kitu pandé kaula... sumuhun.
Teuleum teu werat ka dasar, ka leuwi tangéh rék tepi, tumamprak sadaya-daya. Cag...
Garokgek, 30 Juli 2009
7 Rewah 1430
Baktos pun
Deden Is Kiara
0 Response to "PANGARANG"
Posting Komentar